छत्तीसगढ़ी गज़ल-सुखदेव सिंह अहिलेश्वर

छत्तीसगढ़ी गज़ल-सुखदेव

122 122 122 122

भले डगमगाही ग दारू पिये मा
ओ वादा निभाही ग दारू पिये मा

कदरदान के पक्ष मा चेत करके
बटन ला दबाही ग दारू पिये मा

न सब्जी हे घर मा न हे दार चाउँर
ओ आजो भुलाही ग दारू पिये मा

पुड़ी खीर चीला बरा जेवनागे
ओ पाहुन अघाही ग दारू पिये मा

गली ले बिचारा गरू प्रश्न संसद
कहाँ भेजवाही ग दारू पिये मा

अभी बाप ले कइसे बोलै उबक के
ओ बाँटा कराही ग दारू पिये मा

वसा हे न ग्लूकोज प्रोटिन विटामिन
कहाँ देंह आही ग दारू पिये मा

नशा त्याग दे तँय ह'सुखदेव'भइया
ये जिनगी नसाही ग दारू पिये मा

-सुखदेव सिंह'अहिलेश्वर'