ग़ज़ल - मनीराम साहू 'मितान'
*बहरे रमल मुसम्मन मशकूल सालिम मज़ाइफ़ [दोगुन]*
*फ़यलात फ़ाइलातुन फ़यलात फ़ाइलातुन*
*1121 2122 1121 2122*
नवा दग बिहान आही गियाँ थोरकिन सबर कर।
करू रात हा पहाही गियाँ थोरकिन सबर कर।
भले हे अभी रिसाये सखा तोर वो मयारू,
मया गीत गुनगुनाही गियाँ थोरकिन सबर कर।
कुआँ आस के खने हस सही ज्ञान जल निकलही,
बढ़े प्यास ला बुझाही गियाँ थोरकिन सबर कर।
कला जानथस चिखे के कहे गोठ ला सबन के,
कसा मीठ कस जनाही गियाँ थोरकिन सबर कर।
ले के हार के सहारा बड़े जीत पा जबे गा,
ते हा सत्य बाट राही गियाँ थोरकिन सबर कर।
सरी दिन जपन करे हस हवे हरि अबड़ दयालू,
नठे काम वो बनाही गियाँ थोरकिन सबर कर।
रखे राह गा भरोसा मनी हे मितान सब के,
वो हा दोसती निभाही गियाँ थोरकिन सबर कर।
- मनीराम साहू 'मितान'
No comments:
Post a Comment