*ग़जल--चोवा राम 'बादल'*
*बहरे रमल मुसम्मन सालिम*
फा़इलातुन फा़इलातुन फा़इलातुन फा़इलातुन
2122 2122 2122 2122
मौन अक्षर मा तको बड़ गर्जना ललकार होथे
काट देते क्रूरता ला जे कलम मा धार होथे
दोष किस्मत मा लगाके रोते रहिथे आलसी हा
मेहनत पतवार के बल जिनगी नैया पार होथे
दीन हे ते काय होगे जीत जाही एक दिन वो
सत्य के झंडा फहरथे झूठ के तो हार होथे
एकता के मोल जानौ एकता के मंत्र फूँकौ
जुरके अँगरी मुटका बनथे जोर से तब वार होथे
देख संगी टोरबे झन हे अबड़ अनमोल जेहा
पूजा के धागा सही निर्मल मया के तार होथे
पुरखा मन हावयँ बताये चीख के अनुभव के गोली
करु कसा अउ मीठ चुरपुर कतको हा सख्खार होथे
हे नजर के फेर 'बादल' अउ नजरिया के बदलना
देखबे वो दिखही वइसे सोच मा संस्कार होथे
चोवा राम 'बादल'
हथबंद,छत्तीसगढ़
No comments:
Post a Comment