गज़ल- ज्ञानुदास मानिकपुरी

 गज़ल- ज्ञानुदास मानिकपुरी 

बहरे हजज़ मुसम्मन अशतर मक्फ़ूफ मक्बूज मुखन्नक सालिम

फ़ाइलुन मुफ़ाईलुन फ़ाइलुन मुफ़ाईलन 

212 1222 212 1222

हे गिरे कहूँ कोनो मिलगे उठावत चल

भूलगे हवय कोनो रसता दिखावत चल 

गड़ घलो कभू जाथे कोन जानथे भाई

रसता मा परे काँटा खूँटी हटावत चल 

काम आय नइ घर ला टोर कभू ये देथे

लोभ अउ सुवारथ के कचरा ला जलावत चल 

नइ बना सकस कुछु कखरो बिगाड़ झन भाई

हो सकय अपन ता भाई हाथ ला बँटावत चल 

हाथ पाँव तँय कतको मार होना जें होथे

बस अपन करम के डंडा इहाँ ठठावत चल 

भूलना कहूँ तोला दुख दरद अपन हावय

बनके मस्तमौला गाना मया के गावत चल 

सोच दूर हे मंजिल 'ज्ञानु' हटबे पीछू झन 

छोड़ डर फिकर संसो पग अपन बढ़ावत चल 

ज्ञानु