गजल- चोवा राम 'बादल'

गजल- चोवा राम 'बादल'

बहरे मुतदारिक मुसम्मन सालिम 

फ़ाइलुन फ़ाइलुन फ़ाइलुन फ़ाइलुन

212  212  212  212 

देख इंसान के तो गलत काम हे

वो बिहनिया ले गटकत भरे जाम हे

डरना कानून ले मनखे मन छोड़ दिन

चोरी अउ लूट माते सरेआम हे

मैं बधाई कहाँ ओला कब देय हौं

फेर कइसे के अखबार मा नाम हे

लागथे कैद कर लिन सुरुज ला उहाँ

तब्भे रोज्जे हमर अँगना मा शाम हे

साँप ताकत हे तितली तुरत भाग जा

दाँत मा हे जहर जीभ हा लाम हे

जेन हा बेसहारा हे संसार मा

सिरतो मा ऊँकरो बर सिया राम हे

सस्ता झन तैं समझ ककरो जी प्यार ला

तोर तो हैसियत ले उपर दाम हे

बाँह  मा चंदा थोकुन थिरा ले अभी

घूम झन खोर मा देख ले घाम हे

मूँड़ पीरा कहाँ तो मिटाही सगा

याद रख वादा के नकली ए बाम हे

चोवा राम 'बादल'

हथबन्द, छत्तीसगढ़