छत्तीसगढ़ी गजल-चोवा राम वर्मा 'बादल'

 छत्तीसगढ़ी गजल-चोवा राम वर्मा 'बादल'

*बहरे मज़ारिअ मुसमन अखरब  मकफूफ़ मकफूफ़ महजूफ़*
मफ़ऊल फ़ाइलात मुफ़ाईलु फ़ाइलुन
अरकान-221 2121  1221 212

काला कहौं ले लान दे चश्मा गँवाय हे
जाथे बजार रोज के बेटा भुलाय हे

आमा चुहक के गोही धरादिन हें दोगला
निंद्धा जिनिस ह भाग म उँकरे लिखाय हे

दिखथे बही बरन वो बियाकुल हवै नदी
अंतस म का जनी का दरद जी समाय हे

संस्कार के अभो ले निशानी हे गाँव सो
दे हूम धूप भइया पितर ला मनाय हे

चंदा सरग ले टोरे मैं लाहूँ कहे रहे
अब दिन गुजरगे तोला तभे सुध ह आय हे

हम पाँच में न पँदरा कभू ककरो नइ रहन
फोकट के देख ले वो ह झगरा मताय हे

तोरेच संग जाना हे अँगरी धरे धरे
छाता ल झन भुलाबे गो 'बादल' ह छाय हे

चोवा राम वर्मा 'बादल '
हथबंद, छत्तीसगढ़