ग़ज़ल---चोवा राम 'बादल'

 ग़ज़ल---चोवा राम 'बादल'

*बहरे रमल मुसम्मन मख़बून महज़ूफ़*

*फ़ाइलातुन फ़यलातुन फ़यलातुन फ़ेलुन*

*2122 1122 1122 22*

  बिन पढ़ाई के परीक्षा ह असो होवत हे

 खेल शिक्षा ह बनिस देख न खो होवत हे

छत चढ़े रोज के तो फोन लगाथे बच्चा

आन लाइन म कथे पाठ सबो  होवत हे

हे पछीना के असर खार भले ये हावय

 धान हा लहलहा पथरा म तको होवत हे

राजा के मंत्री ल तो काय फरक परही जी

वो मरय चाहे सरय फेर हहो होवत हे

 वोट पाके तैं टरक गेच कहाँ नेता जी

 छोटकुन काम हमर आज न तो होवत हे

हाई हे बी पी ह बेटा के मिलत नइये काम

अउ ददा दाई के बी पी ह तो लो होवत हे

मूँद के आँखी ल तैं बइठे हवस का 'बादल'

देख अन्याय ल अब दुनिया म जो होवत हे

चोवा राम 'बादल'

हथबंद,छत्तीसगढ़